കലബുറഗി ∙ ആശുപത്രിയിലേക്കുള്ള യാത്രയ്ക്കിടെ കർണാടക ആർടിസി ബസിൽ യുവതിക്കു സുഖപ്രസവം. കലബുറഗി ജില്ലയിലെ ചിൻഞ്ചോളി താലൂക്കിലെ ചത്രാസൽ ഗ്രാമത്തിൽ ശനിയാഴ്ച വൈകിട്ടാണു സംഭവം. ഭർത്താവിനും ഭർതൃമാതാവിനുമൊപ്പം തണ്ടൂരിലെ ആശുപത്രിയിലേക്കുള്ള യാത്രയിലാണു ജ്യോതി (26) ആൺകുഞ്ഞിനു ജന്മം നൽകിയത്.
യുവതിക്കു പ്രസവവേദന ആരംഭിച്ചതോടെ ഡ്രൈവർ ബസ് നിർത്തി യാത്രക്കാരെ ഇറക്കി. രണ്ടു യാത്രക്കാരികൾ സഹായികളായി. അമ്മയെയും കുഞ്ഞിനെയും ബസിൽത്തന്നെ ആശുപത്രിയിലെത്തിച്ചാണു ജീവനക്കാർ മടങ്ങിയത്.
